ជំងឺរលាកដោយបាក់តេរី
១.ជំងឺរលាកដោយបាក់តេរី (Bacterial leaf blight)
មីក្រុបបង្កគឺ Xanthomonas campestris pv. oryzae (X. oryzae) (រូបទី៦០) ។ សញ្ញានៃការខូចខាតគឺលេចឡើងជាបន្ទះវែងៗលាយជាមួយស្នាមជាំដោយទឹកពណ៌លឿងទៅសនៅលើគែមតួស្លឹកស្រូវ ចំណុចសញ្ញាណនេះអាចកើតមានឡើងនៅលើគែមស្លឹកម្ខាង ឬទាំងសងខាង ឬក៏កើតឡើងនៅកន្លែងណាមួយនៃស្លឹករបួស ហើយបន្ទាប់មកវាក៏រាលដាលពេញស្លឹកទាំងមូល (រូបទី៦១) ។ ចំពោះពូជស្រូវដែលឆាប់ទទួលជំងឺ សញ្ញាណនៃការខូចខាតនោះអាចរាលដាលទៅដល់គល់នៃស្រទបស្លឹកទៀត ។
បាក់តេរីប្រភេទនេះចូលរាតត្បាតដល់ប្រព័ន្ធសរសៃដើមស្រូវនៅពេលស្ទូង គឺនៅពេលដែលដើមស្រូវទាំងនោះត្រូវចាប់ដក ហើយឫសវាត្រូវដាច់ ឬស្លឹកមានរបួស ។
នៅពេលដែលបាក់តេរីចូលរាតត្បាតដល់ដើមស្រូវតាមរយៈឫសរបស់វា ឬតាមគល់របស់វា ដើមស្រូវអាចបង្ហាញឲ្យយើងឃើញនូវសញ្ញាជំងឺមួយបែបដែលប្រហាក់ប្រហែលនឹងសញ្ញាជំងឺរបស់ក្រេសិកដែរ (រូបទី៦២) ។ ស្លឹក ឬដើមស្រូវទាំងមូលត្រូវស្រពោននៅក្នុងដំណាក់កាលសំណាបរហូតដល់បែកគុម្ពដំបូង ។ ជួនកាលស្លឹកស្រូវដែលងាយទទួលជំងឺប្រែក្លាយទៅជាពណ៌លឿងព្រលែត ។ ស្លឹកចាស់ៗជាងគេ ហាក់បីដូចជានៅពណ៌បៃតង ហើយមានសភាពធម្មតា រីឯស្លឹកខ្ចីៗជាងគេ ចេញពណ៌លឿងព្រលែត ឬលឿង ឬឆ្នូតលឿង‑បៃតង ។
ប្រភពចម្លងនៃជំងឺបាក់តេរីឆ្លងតាមរយៈចំបើង ជញ្ជ្រាំង ស្រូវដុះសារ និងគ្រាប់ដែលផ្ទុកជំងឺនេះ ឬតាមរយៈរុក្ខជាតិជម្រករបស់វា ។ ជំងឺបាក់តេរីនេះឆ្លងរាលដាលឡើងតាមទឹកសន្សើម ទឹកបញ្ចូលស្រែ ទឹកភ្លៀង ទឹកជំនន់ និងខ្យល់បក់បោកខ្លាំង ។ កោសិកាបាក់តេរីកកើតនៅពេលព្រឹកៗជាដំណក់ទឹកតូចៗជាច្រើនដែលរាយពាសពេញផ្ទៃស្លឹក ហើយជាប់ស្អិតនៅលើផ្ទៃស្លឹកនៃរុក្ខជាតិជម្រក (រូបទី៦៣) ។ សំណើមនៅលើផ្ទៃស្លឹកធ្វើឲ្យដំណក់ទឹកតូចៗនោះរលាយ ជាហេតុធ្វើឲ្យកោសិកាបាក់តេរីអាចរាលដាលបានដោយសេរី ។
ការដាក់ជីអាសូតច្រើនរឹតតែជួយធ្វើឲ្យជំងឺបាក់តេរីកាន់តែរាតត្បាតច្រើនថែមឡើងទៀត ហើយជាពិសេសកន្លែងដែលគេដាំពូជស្រូវឆាប់ទទួលជំងឺនេះ ។
ไม่มีความคิดเห็น:
แสดงความคิดเห็น